Diahuebs mainta Lider di fraccion di MAS parlamentario Marisol Tromp a entrega na Ministerio Publico pruebanan cu el a ricibi di malversacion den un fundacion di deporte di gobierno cu ta resorta bou minister Endy Croes. Hopi biaha hende ta tende rumor y ta papia riba caya pero e parlamentario a ricibi pruebanan preto riba blanco y e ta compronde e consternacion cu tin riba e caso aki paso ta trata di berdad over di mal uzo di funcion di e director di Stichting Sportsubsidie Aruba (SSA) pero ta wak tambe cu valsheid in geschrifte ta tuma lugar. Hopi biaha bo ta core den caya y ta wak hobennan para riba caya ta pidi placa cu bleki den man ta sacudi paso nan mester di placa pa por haci nan deporte y bay afo.
Placa di subsidio no ta yega nan destino
Parlamentario Marisol Tromp a splica cu loke el a entrega ta entre otro documentonan cu prueba cu tin peticionarionan cu ta haci deporte of ta di cierto organisacionnan cu ta inclui hobennan, y nan ta haci peticion pa wordo susbidia, por ehempel, pa bay den exterior y e minister responsabel pa e cartera aki Endy Croes ta haya e petishon aki y aunke e peticion ta pa un fundacion, e minister ta aproba cierto sumanan y bo ta mira aki cu e placa no a yega su destino. Ora hendenan a tuma nota di esaki bo por wak cu e invoicenan ta falso. Ora el a wak e documentonan cu el a ricibi, por mira cu e placanan no ta bay pa e fundacion of hobennan sino ta un invoice falso. Enbes cu e placa bay pa e compania, hoben of organisacion, e placa no ta yega nunca cerca e organisacion of muchanan.
Invoicenan ta wordo falsifica
Al contrario, e invoicenan ta falso y ora di controla bo ta mira cu tin reisburo’s involvi y unda asta documentonan di nan a wordo falsifica. Kiermeen e documento ta aparenta despues cu el a bay pa e director mes y su famia y otro personanan cu nan nomber ta riba dje y cu por ehempel a biaha cu e suma aki. Esaki ta un ehempel chikito pa bo compronde cu ta abuso y ladronicia di placa cu ta destina pa un meta ta wordo mal uza pa un otro meta y no djies un of dos biaha sino den un forma structural. E ta mane un modus operandi, un manera di trata cu placa di fondonan cu tin un destinacion y cu no ta bay pa e destinacion aki. Ora bo wak e papelnan ta parse mane cu e ta bay e destinacion aki, pero ora abo wak bon, e no a yega nunca e meta cual ta e hoben, e mucha, e vereniging di sport. E placa nunca a yega su destinacion.
Modus Operandi
“Aki tin hopi forma cu el a wordo haci y loke mi a haya den mi poder, esey mi a entrega y ta un bunch basta grandi di tur e pruebanan”, asina parlamentario Marisol Tromp ta trece dilanti. E parlamentario di MAS ta haya hopi lamentabel cu un gobierno cu ta papia di integridad, no ta prome bes cu ta wak e tipo di modus operandus aki y vooral cu e minister aki ya a hay’e envolvi den un caso similar antes. Awor aki por mira cu esaki ta sosode atrobe y laga husticia haci su trabou.
Prome Minister no ta entrega keho
Loke si parlamentario Marisol Tromp por bisa ta cu e gobierno aki y muy en particular prome minister Evelyn Wever-Croes na varios occasion ora e a haya sa tipo di casonan cu ta hole machtsmisbruik y cu ta hole cu a abusa di fondo manera por ehempel na Aruba Huis, e no a entrega keho. E tampoco a entega keho siendo cu si bo tin prueba y ley ta bisa duidelijk ‘eenieder di kennis draagt van strafbare feiten’. Dus cualkier persona den comunidad cu sa y a haya sa cu tin prueba di cosnan penal, ta su deber pa entrega keho. Awe por ta parlamentario Marisol Tromp pero mañan por ta otro hende cu ta haya sa di esaki y por bin entrega keho na Ministerio Publico. Un aangifte bo ta bin haci.
Areglo di pago pa un grupito
Por a mira cu Minister President den caso di ArubaHuis no a haci aangifte y a core rond dos aña largo, laga CAD haci onderzoek y gaña cu e onderzoek no ta cla, pa despues entrega algo na Ministerio Publico despues di mas cu dos aña y laga su team y diferente instancianan, entre otro Departamento di Recurso Humano (DRH), tambe CAD y otro instancia pa bai ‘papia’ cu e otro minister. Y kico nos ta wak? Areglo! Areglo cu mag paga bek! Bo ta kere cualkier ciudadano lo haya un chens pa paga bek si nan haya algo asina riba nan? Lo yamanan y invita nan pa sinta y papia pa yega na un areglo cu otro? Ken ta haya e chens aki den comunidad? E ciudadano sigur cu no! Y den casonan asina tin politiconan ta get away cu esaki y ta haya procesonan no penal y e oportunidad di paga bek cu areglo di pago mientras cu nan a malversa placa y haci mal uzo di dje pa otro metanan pa cual e placanan no tabata destina.
Awor aki ta mesun tiro. Den e caso aki no ta e director so ta envolvi. Den e parti di e documentonan cu parlamentario Marisol Tromp por a wak y cu el a entrega na Ministerio Publico pa nan haci nan onderzoek, e parlamentario por wak cu ta trata di un modus operandi, un forma di haci cu lo ta wordo uza den mas lugar y instancia. E parlamentario ta bisa esaki paso por mira cu esaki ta un habito.
Minister Endy Croes a perde caminda pa OM
Den un entrevista e minister di Deporte Endy Croes a bisa cu aparentemente SSA lo a cuminsa cu un investigacion interno y cu nan ta kere cu e lo ta hopi mas grandi cu loke nan a pensa. Esaki no ta kita cu e minister mes por a haci aangifte na Ministerio Publico. Parlamentario Tromp no ta kere cu Minister Endy Croes lo no sa e caminda pa yega Ministerio Publico. E minister ta draag kennis di e strafbare feiten aki, en todo caso den e fundacion aki, y no ta bay Ministerio Publico. Pakico no?! Loke bo tin caba bo por entrega y laga nan cuminsa cu e investigacion. Naturalmente bo tambe por haci mas investigacion interno pero cu loke bo tin na prueba caba, bo mester entrega un keho penal di esaki.
E pruebanan cu parlamentario Marisol Tromp entrega na Ministerio Publico ta ensera diferente suma na diferente instancia deportivo. Cada instancia ta pidi placa cu diferente meta: tin ta biahenan, eventonan y den e documentonan cu por mira nomber di e peticonarionan, por mira cu nan ta bisa cu nan a haci un peticion pero nunca a haya e placa ey. Mientras tanto ta basta placa a wordo paga si door di e director anto eseynan ta puntonan cu mester wordo investiga mas profundo. E pruebanan t’ey pero segun parlamentario Marisol Tromp e por a haya sa un parti di cosnan mas grandi bishitando casnan unda e ta tende hopi storia. Pero cu storia bo no ta yega Ministerio Publico, bo mester di prueba. Ya tin hendenan a admiti den e caso di Stichting Sportsubsidie Aruba (SSA). Si un director of otro persona a admiti, no por duna nan tratopreferncial ala Besaril y ArubaHuis. Esey ta algo condenabel paso asina ta evita di cana e caminda penal pa esnan cu abo ta scohe y duna nan un areglo di pago mientras otronan no ta haya e trato aki. Un falta di integridad grandisimo di e gobierno aki.
